«Քվանտ» վարժարանը սիրով ընդունեց առաջինդասարանցիներին․․․

2021թ. սեպտեմբերի 1-ին հանրապետության բոլոր դպրոցներում, այդ թվում՝ «Քվանտ» վարժարանում տոնական տրամադրություն է թևածում․ երկրով մեկ ոչ միայն հանդիսավորությամբ նշում են նոր՝ 2021-2022 ուստարվա սկիզբը, այլև մեծարանքով տոնում են Գիտելիքի օրը: «Քվանտ» արժարանի տնօրենությունը սիրով և սրտանց շնորհավորում է բոլորին՝ սեպտեմբերյան կրկնակի տոնի առթիվ և մաղթում կրթական ու աշխատանքային մեծ հաջողություններ: 1-ին զանգ, 1-ին պայուսակ, 1-ին ուսուցիչ, հույզեր և սպասումներ․․․ Այս տարի վարժարան ընդունված 70 առաջինդասարանցիների համար այսօր առաջին անգամ հնչեց դպրոցական 1-ին զանգը, և քվանտականի պատասխանատու և պարտավորեցնող կոչումն ընտրած փոքրիկներին սիրով դիմավորեցին նրանց հետ իրենց առաջին հանդիպմանը սրտատրոփ սպասող դասվարները։ ՀՀ օրհներգով, եռագույնը ծածանելով, գույնզգույն փուչիկներով, երգ ու պարով, շնորհավորանքներով, գրկախառնություններով և ձեզ ուղղված ջերմ ելույթներով նրանք մուտք գործեցին իրենց կյանքի նոր շրջափուլը՝ ուսումնառության փուլը։ Վարժարանի տնօրենության ներկայացուցիչ Ա․ Սիմոնյանը իր խոսոքում հավաստիացրեց, որ «Քվանտ» վարժարանի տնօրենությունը և բոլոր-բոլոր ուսուցիչները կանեն առավելագույնը, որպեսզի ուսումնառության առաջին տարիները փոքրիկ քվանտականների համար դառնան երջանիկ մանկության ցանկալի շարունակություն, երբ ամուր հիմք կդրվի գիտելիքների հզոր պաշար ամբարելու գործին, ինչին հաջորդող ավելի հասուն տարիներին կավելանան նաև հայրենասիրության, ընկերասիրության, բարության և գթասրտության դասերը։ Ուզում ենք հավատալ, որ վարժարանի աշակերտական համայնքին նոր անդամագրված առաջինդասարանցիները սիրով կճամփորդեն իրական արժեքների, իրական գիտելիքների և որակյալ կրթության աշխարհով, ինչը նրանց համար խոստանում է ապահովել «Քվանտ» վարժարանը, անսահման կսիրեն «Քվանտ» վարժարանը՝ որպես ձեր երկրորդ տուն, կգնահատեն իրենց ուսուցիչներին՝ որպես իրենց հոգևոր ծնողներ, սիրով կգան դպրոց, նույնքան սիրով էլ կսովորեն՝ կուտակելով գիտելիքների մեծ պաշար, ձեռք բերելով մարդկային բարձր որակներ, որոնք հետագայում կօգնեն ձեզ դառնալ բարձրակարգ և պահանջված մասնագետ, իսկ ամենակարևորը՝ լավ մարդ ու քաղաքացի։