ԳԵՂԵՑԻԿ ՄԻ ՀԱՄԱԳՈՐԾԱԿՑՈՒԹՅԱՆ ՄԵԿՆԱՐԿ ԷԼ ՏՐՎԵՑ

       ՀՀ ԿԳՄՍ նախարարարության սփյուռքահայ ուսուցիչների վերապատրաստման ծրագրի շրջանակում Սփյուռքի տարբեր համայնքներից Հայաստան ժամանած ուսուցիչներ ու կրթական հաստատությունների տնօրեններ օրերս հյուրընկալվել էին «Քվանտ» վարժարանում:
     Տնօրենության ներկայացուցիչները խոսեցին վարժարանի փորձի, կրթության ասպարեզում արձանագրած հաջողությունների, տարբեր խնդիրների լուծման ընթացքում առաջ եկող խնդիրների և դրանց լուծման ուղիների, կրթական գործընթացը հնարավորինս արդյունավետ կազմակերպելու մասին: Կարճ ժամանակ անց հանդիպումը վերածվեց արդյունավետ քննարկման, որի ընթացքում հյուրերը տվեցին իրենց հետաքրքրող հարցերը, ստացան սպառիչ պատասխաններ: Հետաքրքրվեցին նաև, թե ինչպես կարող են օգտվել վարժարանի հնարավորություններից, մասնավորապես ծանոթանալ հայոց լեզվին, հայագիտությանը վերաբերող ձեռնարկներին, ուսումնական նյութերին, մասնակցել վարժարանի հեռավար դպրոցի դասերին:
      Հանդիպում-քննարկումը չափազանց արդյունավետ ու կարևոր էր թե՛ օտար ափերում հայտնված հայրենակիցներին օգնելու պատրաստակամ քվանտականների, թե՛ Սփյուռքի հայկական ամենօրյա և մեկօրյա դպրոցների ուսուցիչների ու տնօրենների համար: Դրվեց մի գեղեցիկ համագործակցության հիմք, որի արդյունքները վստահաբար երկար չեն սպասեցնի:
     Ի դեպ, վարժարանի պատմության ամբիոնի վարիչ, պատմական գիտությունների թեկնածու, դոցենտ Միքայել Մալխասյանը ՀՀ ԿԳՄՍ վերը նշված վերապատրաստման շրջանակում ծրագրի խորհրդատու ուսուցիչ է և վերապատրաստող: