ՔՎԱՆՏԱԿԱՆՆԵՐԸ ԱՐՏԱՆԻՇ ԼԵՌԱՆ ԳԱԳԱԹԻՆ. 8-4 ԴԱՍԱՐԱՆԻ ՀԱՂԹԱՆԱԿԸ ԲՆՈՒԹՅԱՆ ԳՐԿՈՒՄ

    Օրերս Քվանտ վարժարանի 8-4 դասարանի սովորողները դասղեկ Արևիկ Դանիելյանի ուղեկցությամբ իրականություն դարձրին մի հիշարժան ու ոգեշնչող նախաձեռնություն՝ բարձրանալ Արտանիշ լեռը։ Էքսկուրսիան բնության գրկում վերածվեց ոչ միայն գեղեցիկ արկածի, այլև հաղթահարման, ընկերության և ինքնահաստատման փորձության։

   8-4 դասարանի պատանիները՝ լի մեծ խանդավառությամբ, ճանապարհ ընկան՝ միասին հաղթահարելու բարձունքը։ Նրանք բարձրացան քայլ առ քայլ, ժայռից ժայռ՝ միմյանց ոգևորելով ու աջակցելով։ Էքսկուրսիան վերածվեց ուսուցողական փորձի՝ ամրապնդելով նաև դասարանային միասնականությունը։

   Դա իսկական հաղթանակի պահ էր։ Երեխաների աչքերում փայլում էր հաղթածի հպարտությունը, իսկ սրտերում՝ բացահայտման, հաղթահարման ու միասին լինելու բերկրանքը։

   «Դա միայն լեռ չէ, այլ բարձունք էր, որը հաղթահարեցինք ինքներս մեր մեջ», – այսպես բնորոշեցին իրենց զգացողությունները երեխաները։ Դասղեկ Արևիկ Դանիելյանը նշեց, որ նման նախաձեռնությունները նպաստում են երեխաների ֆիզիկական պատրաստվածության, տոկունության ու փոխհամագործակցության հմտությունների զարգացմանը։

   Այսպիսի նախաձեռնությունները վկայում են այն մասին, որ «Քվանտ» վարժարանը ոչ միայն գիտելիքի, այլև մարդկային արժեհամակարգի կրթօջախ է, որտեղ սովորողները դառնում են նախաձեռնող, անկախ մտածող ու համարձակ անհատներ։                                                                                                      

  Հ․ Լ․