Կոմիտաս Վարդապետի ծննդյան 155-ամյակի հոբելյանական տարվա շրջանակում իրականացվող բազմաթիվ միջոցառումների շրջանակում օրերս «Քվանտ» վարժարանի հիմնադիր դպրոցում տեղի ունեցավ Վարդապետի հոբելյանին նվիրված համերգ, որի ընթացքում ներկայացվեց Կոմիտասի արվեստը` նրա թողած ժառանգությունը: Միջոցառման մտահղացման հեղինակն ու կազմակերպիչը վարժարանի երգի ուսուցչուհի Արաքս Հովակիմյանն էր:
Միջոցառման ընթացքում ներկաները հատվածաբար դիտեցին Կոմիտասին նվիրված ֆիլմ, որում ներկայացված էին արժանահիշատակ դրվագներ մեծանուն հայի կենսագրությունից:
Միջոցառումը վարում էին 4-րդ դասարանի սովորողներ, որոնք իրենց խոսքում ներկայացրին մեծերի՝ Կոմիտասին նվիրված գնահատանքի մտքերը:
Կարևոր է նշել, որ «Քվանտ» վարժարանի հիմնադիր դպրոցի բոլոր դասարաններում շուրջ երկու ամիս թևածում էր կոմիտասյան ոգին. ուսուցիչները իրենց դասերի շրջանակում տարբեր առիթներով բազմիցս խոսել են Կոմիտասի կյանքի, գործունեության կարևոր դրվագների մասին՝ այդ ամենին հաղորդակից դարձնելով իրենց հետաքրքրասեր սաներին: Մինչ համերգային ծրագիրը 4-րդ դասարանցիները այցելեցին նաև Կոմիտասի թանգարան-ինստիտուտ:
Մեծանուն հային նվիրված միջոցառումների շարքն ամբողջացավ համերգով: Համերգին մասնակցեցին վարժարանի 2-4-րդ դասարաններում սովորողները. երգի երկու ուսուցիչների (Ա. Հովակիմյան, Ա. Վիրաբյան) ղեկավարությամբ յուրաքանչյուր տարիքային խումբ հանդես եկավ երկուական կատարմամբ: Համերգի երգացանկում ընդգրկված բոլոր ստեղծագործությունները («Շողեր ջան», «Չոբանի շունը», «Հով արեք, սարեր» և այլն) փոքրիկ քվանտականները սովորել և ներկայացնում էին մեծագույն ջերմեռանդությամբ ու պատասխանատվությամբ՝ հուզմունքի և հիացումի բազում պահեր պարգևելով ներկաներին:
Ա. Հովակիմյանի մեկնաբանությամբ նպատակը ոչ թե ուղղակի հերթական միջոցառում կազմակերպելն էր, այլ սովորողներին Կոմիտասյան շունչը փոխանցելը, նրա արվեստի առանձնահատկություններին հաղորդակից դարձնելը:
Ուզում ենք հավատալ, որ նմանատիպ միջոցառումները չափազանց լուրջ արժեք ունեն. դրանք մեծապես նպաստում են ազգային արժեքների հանդեպ սեր ձևավորելուն, դրանք են կերտում ազգային արժեքները կրող, դրանցով առաջնորդվող քաղաքացուն: Հ. Լ.
