ՆՈՐ ՍԿԶԲԻ ՀԱՂԹԱԿԱՆ ՄԵԿՆԱՐԿԸ․․․

Յոթ մասնակից և յոթ մեդալ միջազգային նույն օլիմպիադայից... Եթե կա աշխարհում մրցունակ լինելու սրբազան գաղափար, պայքարելու կամք, ապա ոչինչ չի կարող խանգարել դրանց իրականացմանը։ Ասվածի փայլուն վկայությունը օլիմպիական քվանտականների՝ տարվա հաղթական մեկնարկն է․․․ Սույն թվականի հունվարի 7-13-ը Ղազախստանի Ալմաթի քաղաքում կայացավ Ժաուտիկովյան միջազգային 17-րդ օլիմպիադան՝ «Ինֆորմատիկա», «Ֆիզիկա» և «Մաթեմատիկա» առարկաներից։ Հայաստանից մասնակցեցին 3 թիմեր, որոնցից 1-ը՝ «Քվանտ» վարժարանից (7 մասնակից), իսկ 2-ը՝ Ա․ Շահինյանի անվան Ֆիզմաթ դպրոցից (15 մասնակիցներ)։ Ուրախությամբ արձանագրենք, որ օլիմպիադայի՝ 20 երկրների 146 թիմերի 1006 մասնակիցների մեջ «Քվանտ» վարժարանը ներկայացնող 7 աշակերտն էլ փայլուն են հանդես եկել․ քվանտականներն արժանացել են 5 ոսկե և 2 բրոնզե մեդալների՝ մեծագույն խանդավառություն ու բարձր տրամադրություն պարգևելով ուսուցիչներին, ծանոթներին, բարեկամներին։ Ոսկե մեդալներ են նվաճել «Մաթեմատիկա» առարկայից՝ Լորետա Արզումանյանը (ՄԲ «Դիպլոմա», 12-րդ դասարան), «Ինֆորմատիկա» առարկայից՝ Ալեքսանդր Աբելյանը (12-րդ դասարան), Արայի Խալաթյանը (11-րդ դասարան), «Ֆիզիկա» առարկայից՝ Կարեն Մոսոյանը (ՄԲ «Դիպլոմա», 12-րդ դասարան), Դավիթ Գյուլամիրյանը (12-րդ դասարան)։ «Մաթեմատիկա» առարկայից բրոնզե մեդալների են արժանացել վարժարանի 10-րդ դասարանի աշակերտներ Համլետ Պետրոսյանը և Ռազմիկ Պարզյանը։ Արձանագրած փայլուն արդյունքի համար օլիմպիադայի ավարտին թիմային հաշվարկով «Քվանտ» վարժարանի թիմը զբաղեցրեց առաջին տեղը։ Ջերմորեն շնորհավորում և նորանոր հաղթանակներ ենք մաղթում թե´ մեդալակիրներին, թե´ թիմերի ղեկավարներ, վարժարանի ուսուցիչներ Մաելս Ազիզբեկյանին, Վահագն Կարապետյանին, Ռուբեն Գևորգյանին, Էդուարդ Գրիգորյանին, թիմի ղեկավար Արաքսյա Մահտեսյանին և թե´ բոլոր քվանտականներին: Ուզում ենք հավատալ, որ այս փառահեղ հաղթանակը նոր լիցք կհաղորդի բոլորին ու առժամանակ կկոտրի համընդհանուր հուսահատության և ընկճվածության տրամադրությունները՝ մղելով նոր նվաճումների ու հաղթանակների նաև մեր կյանքի մյուս ասպարեզներում․․․