ՔՎԱՆՏԱԿԱՆ ՏԱՍՆՅԱԿԸ ԿՐԿԻՆ ՆՎԱՃԵՑ ՕԼԻՄՊՈՍԸ․․․

Տարեվերջն ամփոփում ենք հերթական փայլուն հաղթանակով։ Անգամ համավարակը չի խանգարում օլիմպիական քվանտականներին․ նրանք եռանդուն պարապում են և քվանտականին հատուկ կեցվածքով հանդես գալիս միջազգային կարևոր ստուգատեսներին։ Մեգապոլիսների միջազգային ամենամյա օլիմպիադայում ևս քվանտական տասնյակը փայլուն հանդես եկավ։ Համավարակով պայմանավորված՝ օլիմպիադան կազմակերպվեց առցանց եղանակով։ Աշխարհի մի շարք երկրների շուրջ 50 թիմերի հետ մրցելով՝ «Քվանտ» վարժարանի՝ 8 պատանուց կազմված թիմը 51 միավորով գրավեց առաջին տեղը։ «Մաթեմատիկա», «Ֆիզիկա», «Քիմիա», «Ինֆորմատիկա» առարկաների գերազանց իմացությամբ աչքի ընկան 9-12-րդ դասարաններում սովորող քվանտականները։ Վարժարանի հավաքականի կազմում ընդգրկված պատանիներից Համլետ Պետրոսյանն (11-րդ դասարան) ու Վահե Սահրադյանը (10-րդ դասարան) մասնակցեցին մաթեմատիկայի, Ավետիք Նավոյանը (12-րդ դասարան), Համլետ Աբրահամյանը (ՄԲ «Դիպլոմա» ծրագրի 12-րդ դասարան)՝ ֆիզիկայի, Յուրի Պետրոսյանը (11-րդ դասարան), Սոնա Սաղեյանը (12-րդ դասարան)՝ քիմիայի, Հայկ Աղայանը (11-րդ դասարան) և Գագիկ Գևորգյանը (9-րդ դասարան)՝ ինֆորմատիկայի օլիմպիադաներին։ Ուշագրավն այն է, որ երկու քվանտական էլ ընդգրկված էր Երևան քաղաքի թիմում։ 12-րդ դասարանի սովորող Արայի Խալաթյանը (ինֆորմատիկա) և 11-րդ դասարանի սովորող Լեոնիդ Ասատրյանը (քիմիա) արժանացան արծաթե մեդալների՝ իրենց օլիմպիական մեդալների ընդգրկուն շարքը համալրելով ևս մեկով։ Ջերմորեն շնորհավորում ենք բոլոր քվանտականներին և խոր հավատով սպասում, որ օլիմպիական քվանտականները չեն խախտի տասնամյակներ առաջ ստեղծված գեղեցիկ ավանդույթը․ տարին կսկսեն և կավարտեն փառահեղ հաղթանակներով։