ՔՎԱՆՏԱԿԱՆԻ ԴԻՏԱԿԵՏՈՒՄ ՊԱՏՄԱՄՇԱԿՈՒԹԱՅԻՆ ՎԱՅՐԵՐՆ ԵՆ․․․

«Քվանտ» վարժարանի ուսումնադաստիարակչական գործընթացի անբաժանելի մասն են կազմում տարբեր էքսկուրսիաները, ճանաչողական այցերը Հայաստանի պատմամշակութային վայրեր։ Հենց նմանատիպ միջոցառումների շրջանակում 7-5 դասարանի աշակերտները դասղեկ Ա․ Հարությունյանի ուղեկցությամբ հյուրընկալ Արագածոտնում էին։ Կազմակերպվել էր հերթական էքսկուրսիան։ Ընտրված երթուղին չափազանց ընդգրկուն էր։ Քվանտականները եղան Հայաստանի լավագույն կառույցներից մեկում՝ Արշակունիների դամբարանում, որտեղ դասղեկ Ա․ Հարությունյանը հետաքրքիր զրույց-քննարկում ծավալեց Արշակունիների կառավարման շրջանի Հայաստանի պատմության վերաբերյալ։ Զգացվեց, որ աշակերտները մեծապես հետաքրքրված էին պատմական այդ ժամանակաշրջանով։ Քվանտականները եղան նաև Տեղերի վանական համալիրում և շատ տպավորվեցին նրա ճարտարապետական ձևերի գեղագիտական բարձր հատկանիշներով։ Դասղեկ Ա․ Հարությունյանը, որ նաև պատմության մասնագետ է, արժեքավոր տեղեկություններ ներկայացրեց վանական համալիրի հիմնադրման ու գործունեության վերաբերյալ։ Հիշարժան տպավորություններով, լի աշնան արևով, վառ զգացողություններով, վերագտած էներգիայով ու ներդաշնակությամբ քվանտականները վերադարձան տուն։