ՔՎԱՆՏԱԿԱՆԸ՝ ՀՀ ԳԱԱ ՔԻՄԻԱԿԱՆ ՖԻԶԻԿԱՅԻ ԻՆՍՏԻՏՈՒՏԻ ՀՅՈՒՐ
07.11.2023
Օրերս ՀՀ ԳԱԱ Քիմիական ֆիզիկայի ինստիտուտի կազմում գործող «Կենսահամատեղելի նյութերի ֆիզքիմիա» գիտական խումբը հյուրընկալել էր «Քվանտ» վարժարանի 9-րդ դասարանի սաներին։ 9֊2 դասարանի աշակերտներին ուղեկցում էին դասղեկ Հ. Մանուչարյանը և ֆիզիկայի ուսուցչուհի Լ. Մանուկյանը։
Խումբը զբաղվում է կենսահամատեղելի հումքի ստացումով և եռաչափ տպագրությամբ, որը հնարավորություն կտա վերականգնելու ոսկորի վնասվածքները, ինչպես նաև
մետաղական հարմարեցված իմպլանտների եռաչափ տպագրությամբ և կերամիկական հիմքով կոմպոզիտային փոշեխառնուրդների մշակումով, որոնք հումք
պետք է ծառայեն տիեզերքում գործող սարքավորումների ջերմային կառավարման համակարգերի համար։
Այցի ընթացքում աշակերտները ծանոթացան լաբորատորիայում առկա երեք տիպի եռաչափ տպիչների աշխատանքի սկզբունքներին․
✓ Թերմոպլաստիկ ֆիլամենտով աշխատող եռաչափ տպիչ “Ender 6”, որն օգտագործվում է պրոտոտիպերի պատրաստման համար։
✓ “SLM-50 Realizer” եռաչափ տպիչ, որը նախատեսված է բարդ երկրաչափական կառուցվածքով դետալների և հարմարեցված իմպլանտների տպագրության համար մետաղական և կերամիկական փոշիներից։
✓ Հեղուկ պոլիմերմերով աշխատող եռաչափ տպիչ “Lithoz CeraFab L30”, որը նախատեսված է կենդանիների բնական ոսկորներից ստացված հումքի և տարբեր կենսահամատեղելի պոլիմերների խառնուրդների եռաչափ տպագրության համար։
Ներկայացվեցին նաև լաբորատորիայում առկա օժանդակ սարքավորումները՝ բարձր ջերմաստիճանային վառարան, մոլորակային գնդաղաց, հղկող սարքավորումներ և այլն։
Նմանատիպ հանդիպումները մեծապես նպաստում են քվանտականների մտահորիզոնի ընդլայնմանը և առողջ հող նախապատրաստում մասնագիտության ընտրության համար։
