Անցնող տարվա ավարտը «Քվանտ» վարժարանում նշանավորվեց մի հաճելի արարողությամբ․ ամփոփվեցին «Քվանտ» վարժարանի ամենամյա մրցանակաբաշխության արդյունքները։ Վարժարանի դահլիճում աշխույժ եռուզեռ է․ հավաքված աշակերտները, ուսուցիչները, ծնողները անհամբեր սպասում են արդյունքների հրապարակմանը։
Հնչում է վարժարանի հիմնը։ Քվանտականները հոտնկայս լսում են այն, ապա միջոցառման վարող, վարժարանի աշխարհագրության ամբիոնի վարիչ Ս․ Սուվարյանի առաջարկով ներկաները բուռն ծափահարություններով ողջունում են տարվա ընթացքում փայլուն արդյունքներ արձանագրած քվանտականներին։
Ամփոփվում են մի քանի մրցույթներ։ Նախ՝ մեծարվում, մեծ գնահատանքի ու արժեքավոր նվերների են արժանանում ուստարվա առաջին կիսամյակում միջազգային օլիմպիական հաղթարշավում իրենց փայլուն դրսևորած մի խումբ քվանտականներ։ Մեծարման են արժանանում նաև «Հայագիտակ» մրցույթի հաղթողները։ Ի դեպ, մրցույթն այս տարի առաջին անգամ էր իրականացվում և բուռն ոգևորություն առաջացրեց շատերի մոտ։
Ամառային հանձնարարությունների համար հայտարարված մրցույթի հաղթողներին հանձնվում են իրենց դիպլոմները։ Ա․Օսկանյանի անվան հուշամրցույթի հաղթող աշակերտները ևս ստանում են իրենց դիպլոմները։ Մրցանակի են արժանանում նաև «Բրեյն-ռինգ» ինտելեկտուալ խաղի հաղթողները՝ <<Լավագույն խաղացողների>> թիմի սովորողները, խաղաշրջանի լավագույն խաղացող Շահինյան Միքայելը 12-3-րդ դասարան։
Ջերմորեն շնորհավորում ենք բոլոր հաղթողներին։
