«Քվանտ» վարժարանի տաղանդաշատ սաները հերթական անգամ բարձր պահեցին սիրելի կրթօջախի պատիվը՝ միջազգային գիտական ասպարեզում գրանցելով բացառիկ հաջողություն Կիրառական կենսաբանության՝ 2025 թ. հունիսի 26-30-ը 5-րդ միջազգային օլիմպիադայում։ Մեր աշակերտներն իրենց գիտելիքներով, վերլուծական մտածողությամբ և անկոտրում կամքով արժանացան միջազգային հանձնաժողովի բարձր գնահատականին՝ նվաճելով միանգամից հինգ մեդալ՝ երեք արծաթ և երկու բրոնզ։
Օլիմպիադայի պաշտոնական կազմակերպիչ երկիրը Ինդոնեզիան էր, անցկացման վայրը՝ Բալի քաղաքը։ Մեր թիմը մասնակցեց առցանց ձևաչափով՝ «Քվանտ» վարժարանը ու Հայաստանը ներկայացնելով պատվով և փայլուն արդյունքներով։ Քվանտական պատանիներ Մկրտիչ Պապոյանը (10-րդ դասարան), Ավետ Բադալյանը (10-րդ դասարան) և Արամ Աղաբաբյանը (12-րդ դասարան) արժանացան արծաթե, իսկ Էդգար Խաչատրյանը (10-րդ դասարան) և Աստղիկ Մարգարյանը (9-րդ դասարան)՝ բրոնզե մեդալների:
«Քվանտ» վարժարանի՝ գիտության ու նորարարության հանդեպ հավատը ևս մեկ անգամ արդարացավ։ Մեր աշակերտների ձեռքբերումները խոսում են այն մասին, որ կրթական ճիշտ քաղաքականության, տեսական հիմքի և պրակտիկ փորձառության համադրման դեպքում հնարավոր է ոչ միայն հասնել հաջողության, այլև դառնալ օրինակ միջազգային մակարդակով։
Շնորհավորում ենք հաղթող քվանտականներին, նրանց ծնողներին, ինչպես նաև մասնագիտական հմուտ թիմին, որը մեծ նվիրումով ճանապարհ է հարթում դեպի գիտության բարձունքներ։
Քվանտականի հաղթանակը բոլորիսն է։ Գիտելիքը ուժ է, իսկ «Քվանտ» վարժարանը՝ անփոխարինելի գիտելիքի տուն։
Հ.Լ.
