«Քվանտ» վարժարանում ձևավորվել են բազում գեղեցիկ ավանդույթներ: Դրանցից մեկն էլ այն է, որ ուստարին ավարտում և հաջորդը սկսում ենք օլիմպիական հաղթանակներով: Այս տարին բացառություն չէ: Բուլղարիայի Շումեն քաղաքում օրերս ավարտվեց Եվրոպայի ջունիորների ինֆորմատիկայի 9-րդ օլիմպիադան, որտեղ ՀՀ պատվիրակությունը գրանցեց նշանակալի հաջողություններ։ Մեր երկիրը ներկայացնող 4-հոգանոց խմբում երեքը քվանտական պատանիներ էին, իսկ մեկը Գյումրու թիվ 41 հիմնական դպրոցի աշակերտ: Մեծագույն ուրախությամբ նշում ենք, որ վարժարանի սաները կրկին պատվով ներկայացան միջազգային հարթակում՝ արձանագրելով հիանալի արդյունքներ: Մասնավորապես Հայկ Մանուկյանը արժանացավ արծաթե, իսկ Արեն Գրիգորյանը՝ բրոնզե մեդալների: Հայաստանի թիմը, փոքրաթիվ լինելով հանդերձ, ապացուցեց, որ ունի մեծ ներուժ և կարող է արժանիորեն մրցել եվրոպական լավագույնների հետ։ Հատկապես տպավորիչ է, որ մեր երկու քվանտականներն իրենց գիտելիքներով ու պատրաստվածությամբ հերթական անգամ բարձրացրին վարժարանի անունը միջազգային մակարդակում։
Ճանապարհը դեպի այս հաղթանակը հնարավոր դարձավ՝ շնորհիվ հովանավորների՝ «Քվանտ» վարժարանի, CodeSignal-ի և Improvis-ի, որոնց աջակցությամբ ապահովվեց թիմի մասնակցությունը Բուլղարիայում կայացած օլիմպիադային։ Այս արդյունքը ոչ միայն ուրախություն ու հպարտություն է մեզ համար, այլև խրախուսանք՝ շարունակ զարգանալու, գիտելիքի հանդեպ սեր ու նվիրում սերմանելու։
Քվանտականները կրկին ապացուցեցին, որ հայ դպրոցականների միտքը սահմաններ չի ճանաչում։
Ջերմորեն շնորհավորում ենք հաղթողներին՝ մաղթելով նորանոր նվաճումներ:
