Ս․թ․հունիսի 19-22-ը Լոմոնոսովի անվան Մոսկվայի պետական համալսարանի աշխարհագրության ֆակուլտետն առցանց ձևաչափով երկրորդ անգամ անցկացրեց աշխարհագրության միջազգային բաց օլիմպիադա, որին մասնակցեցին 26 երկրի 126 աշակերտներ։ Յուրաքանչյուր երկիր հնարավորություն ուներ ներկայացնելու 15-19 տարեկան աշակերտներից կազմված մեկ թիմ՝ առավելագույնը 6 մասնակցով։ Թիմերը ձևավորվել են իրենց երկրներում անցկացված աշխարհագրության մրցույթների արդյունքներով։
ՀՀ թիմը միջազգային հարթակում գրանցեց նշանակալի հաջողություն՝ արժանանալով 3 արծաթե և 1 բրոնզե մեդալի։ Հատկանշական է, որ Հայաստանի թիմի հաջողության մեջ իրենց կարևոր ներդրումն են ունեցել «Քվանտ» վարժարանի աշակերտները․ վարժարանի երկու սան՝ Էրիկա Հարությունյանը (12-րդ դասարան), և Միքայել Դարբինյանը (11-րդ դասարան), արժանացել են արծաթե մեդալների։ Ուրախությամբ արձանագրենք, որ երկուսն էլ վարժարանի՝ ՄԲ «Դիպլոմա» ծրագրի սովորողներ են։
Օլիմպիադային Հայաստանի թիմի կազմում մասնակցել է նաև «Քվանտ» վարժարանի 12-րդ դասարանի աշակերտ Սարգիս Խալաթյանը։
Հայաստանի թիմը ղեկավարել է ԵՊՀ դասախոս, «Քվանտ» վարժարանի ուսուցիչ, ինչպես նաև վարժարանի շրջանավարտ, աշխարհագրության հանրապետական օլիմպիադայի հանձնաժողովի նախագահ Վարդան Ասատրյանը։ Այս հանգամանքը հատկապես խորհրդանշական է․ քվանտական կրթական միջավայրում ձևավորված մասնագետն այսօր ոչ միայն դասավանդում է վարժարանում, այլև միջազգային օլիմպիադաներում առաջնորդում է հայ պատանիների թիմը՝ նպաստելով նոր սերնդի հաջողություններին։
Օլիմպիադան անցկացվել է անգլերենով և բաղկացած է եղել երեք փուլից՝ տեսական, գործնական-քարտեզագրման և մուլտիմեդիա-թեստային։ Մասնակիցները մրցել են աշխարհագրական խորքային գիտելիքների, քարտեզագրական հմտությունների, վերլուծական մտածողության և արագ կողմնորոշվելու կարողությունների շնորհիվ։
Նշենք, որ Լոմոնոսովի անվան Մոսկվայի պետական համալսարանի աշխարհագրության միջազգային առաջին բաց օլիմպիադայում Հայաստանի թիմը նույնպես տպավորիչ արդյունք էր գրանցել՝ արժանանալով 2 արծաթե և 3 բրոնզե մեդալի։ Այս տարվա արդյունքը ևս մեկ անգամ փաստում է, որ Հայաստանի դպրոցականները կարողանում են արժանապատվորեն ներկայանալ միջազգային գիտակրթական հարթակներում, իսկ «Քվանտ» վարժարանի սաները շարունակում են բարձր պահել վարժարանի և Հայաստանի անունը։
Շնորհավորում ենք Հայաստանի թիմին, մրցանակակիրներին, մասնակիցներին և թիմի ղեկավար Վարդան Ասատրյանին՝ մաղթելով նորանոր հաղթանակներ միջազգային օլիմպիադաներում։
Հ․Լ․
