Ս․ թ․ ապրիլի 23-29-ը Լիտվայի մայրաքաղաք Վիլնյուսը դարձավ եվրոպական մաթեմատիկական մտքի կենտրոնը․ այստեղ կայացավ Եվրոպայի մաթեմատիկական առաջին օլիմպիադան՝ European Mathematical Olympiad-ը, որը համախմբել էր մայրցամաքի ուժեղագույն պատանի մաթեմատիկոսներին։ Մրցույթը կազմակերպվել էր որպես նոր միջազգային հարթակ՝ օլիմպիական բարձրակարգ պատրաստվածություն ունեցող սովորողների համար։
Հայաստանի թիմը, «Քառակուսի» հիմնադրամի ֆինանսավորմամբ, պատվով ներկայացավ հեղինակավոր այս մրցույթին՝ նվաճելով 1 արծաթե և 5 բրոնզե մեդալ։ Այս արդյունքը ոչ միայն մեր աշակերտների անհատական ջանքի և տաղանդի վկայությունն է, այլև Հայաստանի մաթեմատիկական դպրոցի կայուն առաջընթացի հերթական վկայությունը։
Առանձնահատուկ հպարտությամբ պետք է նշել, որ ՀՀ թիմի վեց մեդալակիրներից չորսը «Քվանտ» վարժարանի աշակերտներ են։ Վարժարանի 10-րդ դասարանի սաներ Տիգրան Հախեյանը, Հայկ Մանուկյանը, Արեն Գրիգորյանը և Արման Խաչատրյանը նվաճել են բրոնզե մեդալներ՝ իրենց անունը գրանցելով եվրոպական մաթեմատիկական առաջին օլիմպիադայի պատմության մեջ։
Այս նվաճումը հատկապես արժեքավոր է, քանի որ քվանտական մեդալակիրները դեռ 10-րդ դասարանի աշակերտներ են։ Նրանց հաջողությունը խոսում է ոչ միայն բացառիկ կարողությունների, այլև երկարատև, հետևողական և խորքային աշխատանքի մասին։ Օլիմպիական մաթեմատիկան պահանջում է ոչ միայն գիտելիք, այլև ստեղծագործական մտածողություն, համառություն, արագ կողմնորոշում և բարդ խնդիրների հանդեպ անվախ մոտեցում։
«Քվանտ» վարժարանի համար այս հաղթանակը հերթական անգամ հաստատում է այն սկզբունքը, որ կրթական ուժեղ միջավայրը, նվիրված ուսուցիչները և նպատակասլաց աշակերտները կարող են ստեղծել մեծ արդյունքներ։ Տիգրանի, Հայկի, Արենի և Արմանի հաջողությունը ոչ միայն անձնական հաղթանակ է, այլ նաև ոգեշնչող օրինակ իրենց հասակակիցների համար։
Շնորհավորում ենք Հայաստանի թիմին, բոլոր մեդալակիրներին, նրանց ուսուցիչներին, ծնողներին և աջակիցներին։ Հատուկ շնորհավորանքներ քվանտական պատանիներին, որոնք իրենց աշխատասիրությամբ և փայլուն արդյունքով բարձր են պահում թե՛ Հայաստանի, թե՛ հարազատ կրթօջախի անունը եվրոպական մաթեմատիկական կարևոր այդ մրցասպարեզում։
Հ. Լ.
