Աղավնաձորյան կառուցողական քննարկումներ և արդյունավետ համագործակցություն․ հենց դրանց շնորհիվ են ծնվում փայլուն գաղափարներ․․․

Ավարտվեց ուսումնական ևս մեկ տարի, որը, սակայն, էապես տարբերվում էր՝ պայմանավորված աշխարհին պատուհասած համավարակով և 44-օրյա պատերազմով։ «Քվանտ» վարժարանի՝ ողջ տարին մեծագույն ջերմեռանդությամբ աշխատած և իրենց կարևորագույն առաքելությունը փառքով կատարած մեր աշխատակիցները կարող են գնալ վաստակած հանգստի՝ ուսումնական մյուս տարվա աշխատանքները նույն արդյունավետությամբ կազմակերպելու համար։ Սակայն մինչ այդ տարվա ընթացքում վարժարանի կատարած աշխատանքները ամփոփելու նպատակով հրավիրվեց տարեվերջյան հավաք։ Ս․թ․ հուլիսի 18-21-ը «Քվանտ» վարժարանի՝ Աղավնաձորում գտնվող «Ուղեծիր» ուսումնական կենտրոնի հյուրընկալ հարկի տակ հավաքվել էին վարժարանի տարբեր ամբիոնների մի շարք ուսուցիչներ։ Նպատակը տարեվերջյան ամփոփիչ սեմինարն էր, որի ընթացքում վեր հանվեցին կենսական նշանակություն ունեցող մի շարք խնդիրներ, բազմաշերտ քննարկումներ ծավալվեցին դրանց վերաբերյալ, փորձ արվեց գտնել զգալի հարցերի համակարգային լուծումներ՝ սկսած գնահատումից մինչև կրթական գործընթացի առավել արդյունավետ կազմակերպմանն ուղղված քայլեր, որոնք էլ ավելի ամբողջական կդարձնեն կրթությունը։ Հաշվետվությամբ հանդես եկան նաև ուսումնական մասի պատասխանատու Լևոն Ասատրյանը, ամբիոնների վարիչները՝ խոսելով առկա խնդիրների, դրանց լուծման ուղիների մասին։ Ուշագրավն այն էր, որ այս տարի, բացի վարժարանի տարբեր ամբիոնների ներկայացուցիչներից, կային նաև բանախոսներ։ Եռօրյա սեմինարի առաջին օրը չափազանց հետաքրքիր և արդիական թեմաներով հանդես եկան ՀՀ ՊՆ պաշտպանական ազգային հետազոտական համալսարանի վերլուծաբան, սոցիոլոգ Ա․ Խաչիկյանը (թեմա՝ «Հետազոտությունների քանակական և որակական մեթոդները») և ՀՀ ԱԽ գրասենյակի վարչության նախկին պետ, ք․գ․թ․ Ա․ Բեգլարյանը (թեմա՝ «ՀՀ տեղեկատվական ոլորտի հիմնախնդիրները և մեդիագրագիտությունը»)։ Մայր Աթոռ Ս․ Էջմիածնի Մատենադարանի և հրատարակչության տնօրեն Տ․ Արարատ քահանա Պողոսյանի բանախոսությունը ևս՝ «Հոգևոր կրթության անհրաժեշտությունը հանրակրթական հաստատություններում» թեմայով, նույնպես չափազանց կարևորեցին բոլոր քվանտականները, և ծավալվեց բուռն քննարկում։ Մասնագիտական բարձր որակների ու մարդկային գեղեցիկ հարաբերությունների ներդաշնակ համադրությամբ սեմինարներն էլ ավելի ամբողջական ու ընդգրկուն էին դառնում։ Վարժարանի աշխատակիցների տարեվերջյան եռօրյա ամփոփիչ հավաքը, անշուշտ, կտա իր ցանկալի արդյունքները՝ լույսի ջահակիր քվանտականների համար բացելով նորանոր հորիզոններ։