Հիշատակի և խոնարհումի մեկ րոպե...

Լրացավ 44-օրյա պատերազմի մեկ տարին: Սեպտեմբերի 27-ին՝ ժամը 11-ին, ինչպես ՀՀ և Արցախի Հանրապետության տարբեր հաստատություններում, այնպես էլ «Քվանտ» վարժարանում մեկ րոպե լռություն է հայտարարվել՝ ի հիշատակ մեկ տարի առաջ Ադրբեջանի կողմից սանձազերծված 44-օրյա պատերազմի զոհերի: Հնչեց լռության րոպեի սկիզբը ազդարարող զանգը, և վարժարանի բոլոր դասարաններում սովորող աշակերտները ոտքի կանգնեցին ու իրենց լռությամբ հաստատեցին իրենց խոնարհումը զոհվածների հիշատակին: Ամիսներ առաջ վարժարանում բացվել էր զոհված շրջանավարտների անկյուն: Լռության րոպեն հենց այդ հուշատախտակի մոտ էր համախմբել վարժարանի տնօրենությանը, ուսուցչական կազմին՝ տնօրեն Ռ. Վարդանյանի գլխավորությամբ: Վարժարանի փայլուն շրջանավարտներ Ռուստամ Գալստյանը, Սեդրակ Սեդրակյանը, Դավիթ Պողոսյանը 44-օրյա պատերազմի ընթացքում աչքի ընկան իրենց անձնուրաց պայքարով: Այդ հերոս քվանտականները ոչ թե ամեն քայլափոխի գոռացին հայրենասիրության մասին, այլ անկախ հայրենիքի վաղվա օրը տեսնելու հույսով զոհասեղանին դրեցին ամենաթանկը՝ իրենց կյանքը: Հավերժ փառք ու խոնարհում նրանց և բոլոր զոհերի սուրբ հիշատակին...