Նորություններ
ԱՄԱՆՈՐԻ ՈՒՂԵՐՁ
30.12.2021
Հարգելի՛ աշակերտներ, ծնողներ և ուսուցիչներ, ավարտվում է 2021 թվականը։ Այն մեր պետության ու ժողովրդի համար հագեցած էր մի շարք դժվարություններով, լուրջ մարտահրավերներով։ «Քվանտ» վարժարանը չէր կարող անմասն մնալ դրանցից։ Սակայն տարին քվանտականների համար նշանավորվում է նաև բազում հաջողություններով, լրջագույն նվաճումներով։ 2021 թ․ ողջ ընթացքում «Քվանտ» վարժարանի սաները միջազգային հեղինակավոր օլիմպիադաներում արժանացել են 20 մեդալի՝ 5 ոսկի, 7 արծաթ, 8 բրոնզ։ Ուշագրավն այն է, որ քվանտականները հաղթանակներ են արձանագրում ոչ միայն անհատական, այլ նաև թիմային հաշվարկով, մասնավորապես հունվար ամսին Ժաուտիկովյան 17-րդ միջազգային օլիմպիադայում «Քվանտ» վարժարանը ներկայացնող 7-հոգանոց թիմը, 20 երկրների 146 թիմերի հետ մրցելով, գրավում է առաջին տեղը։
Գարնանը վարժարանի թիմը (Դավիթ Գյուլամիրյանը, Կարեն Ալեքսանյանը և Ռոբերտ Սիմոնյանը)՝ ֆիզիկայի ամբիոնի բարձրակարգ և արհեստավարժ մասնագետ Գրիգոր Աղաբաբյանի գիտական ղեկավարությամբ, նախ հաղթում է գիտության համադպրոցական փառատոնի Հայաստանի փուլում, ապա իր ստեղծած «Արհեստական քթով» (խումբը ներկայացնում է չափազանց հետաքրքիր թեմա՝ «Հոտերի տարբերակում արհեստական բանականության կիրառմամբ») մեծապես տպավորում գիտության համաշխարհային փառատոնի կազմակերպիչներին և զբաղեցնում 4-րդ հորիզոնականը։
Օրերս արձանագրվում է քվանտականների թիմային հերթական հաղթանակը․ աշխարհի մի շարք երկրների շուրջ 50 թիմերի հետ մրցելով՝ «Քվանտ» վարժարանի՝ 8 պատանուց կազմված թիմը 51 միավորով գրավում է առաջին տեղը՝ 18 միավորով գերազանցելով Նյու Դելիի՝ 2-րդ հորիզոնականում հայտնված թիմին։ Ուզում ենք հավատալ, որ օլիմպիական հաղթարշավում փայլուն մասնակցությունը քվանտականները կշարունակեն նաև գալիք տարում։
Ուզում ենք հավատալ, որ գալիք տարում կշտկվեն նաև արձանագրված որոշ թերություններ։ Դեռ կան հրատապ լուծման կարոտ խնդիրներ և նոր մարտահրավերներ, որոնք պահանջում են բոլորիս համատեղ ջանքն ու աշխատանքը: Մեզանից յուրաքանչյուրի պատասխանատվությունն ու դավանած արժեքները պիտի իրական դարձնեն բոլոր համարձակ նախաձեռնությունների կյանքի կոչելը:
Սիրելի՛ քվանտականներ, ջերմորեն շնորհավորում ենք գալիք Ամանորն ու Սուրբ Ծնունդը՝ մաղթելով քաջառողջություն, առաջընթաց, միայն դրական լիցքեր, հույս, հավատ, սեր՝ բոլոր դժվարությունները հաջողությամբ հաղթահարելու և անվտանգ ու ապահով պետություն ունենալու, խաղաղ և բարօր կյանքով ապրելու համար: Թող 2022 թվականը լինի խաղաղության, հաղթանակների ու վերելքների տարի, լավատեսությամբ լցնի բոլորիս հոգիները, իրական երջանկությունը և հաջողությունը հասանելի ու տեսանելի լինեն բոլորիս: Բոլորիս ընտանիքներում և մեր հայրենիքում թևածեն լավատեսությունը, ներդաշնակությունն ու բարօրությունը: Սերը, հոգատարությունն ու փոխըմբռնման մթնոլորտը թող տիրեն յուրաքանչյուրիդ տանն ու ընտանիքում:
ՇՆՈՐՀԱՎՈՐ ԱՄԱՆՈՐ ԵՎ ՍՈՒՐԲ ԾՆՈՒՆԴ․․․
«Քվանտ» վարժարանի տնօրենություն
