Նորություններ
ԱՇԽԱՐՀԱՀՌՉԱԿ ԳԻՏՆԱԿԱՆՆ ՈՒ ԱՇԽԱՐՀԻ ԳԻՏՈՒԹՅՈՒՆԸ «ՔՎԱՆՏ» ՎԱՐԺԱՐԱՆՈՒՄ
11.11.2022
Վերջերս «Քվանտ» վարժարանում էր քվանտականների լավագույն բարեկամ, աշխարհահռչակ գիտնական, ակադեմիկոս, Մոսկվայի պետական համալսարանի մաթեմատիկական տրամաբանության և ալգորիթմների տեսության ամբիոնի վարիչ Ալեքսեյ Սեմյոնովը։
Մեծանուն գիտնականի և քվանտականների բարեկամությունը արդեն տարիների պատմություն ունի։ Այս անգամ ևս նրա այցը նշանավորվեց մի շարք հետաքրքիր միջոցառումներով։
Սեմյոնովը մի քանի սեմինար անցկացրեց վարժարանի հիմնադիր դպրոցի ուսուցիչների հետ։ Նպատակը փորձի փոխանակումն էր։ Գիտնականը նշեց, որ իրենք էլ մշակված ծրագիր ունեն տարրական դասարաններում սովորողների համար։ Նրան հետաքրքրում էր, թե վարժարանի տարրական դասարաններում «Մաթեմատիկա» առարկան ինչպես են սովորեցնում, ինչ մեթոդներ են կիրառում՝ ուսուցման գործընթացը էլ ավելի արդյունավետ դարձնելու համար։
Ուշագրավն այն էր, որ մեծանուն գիտնականը ներկայացրեց նաև իր փորձը տարրական դասարաններում ոչ ստանդարտ և հետաքրքիր ձևով մաթեմատիկայի մատուցման ձևերի ու մեթոդների մասին, մեծապես կարևորեց տարրական դպրոցում նաև մյուս առարկաների դասավանդման ժամանակ մաթեմատիկական մեթոդների կիրառման մասին։
Սեմյոնովը հանդիպում ունեցավ նաև վարժարանի բարձր դասարաններում սովորող, օլիմպիական խմբակների մասնակից քվանտականների հետ, որոնք մաթեմատիկայով մեծապես հետաքրքրված են։ Նրանց հետ քննարկեց գիտական մի շարք խնդիրներ, որոշակիորեն հասկացավ քվանտականների գիտական հետաքրքրությունների շրջանակը։ Հենց այդ քննարկման ավարտին էլ նա ձևավորեց քվանտական սովորողների խումբ՝ վերջիններիս հետ սկսելով հետազոտական աշխատանքի հետաքրքիր մի նախագիծ՝ մաթեմատիկական արդի խնդիրների վերաբերյալ։
Ուզում ենք հավատալ, որ նմանատիպ հանդիպումները մեծապես կնպաստեն գիտնական քվանտականի կերպարը առավել ամբողջական դարձնելուն՝ մեկ անգամ ևս հաստատելով այն միտքը, որ «Քվանտ» վարժարանը գիտակրթական մի յուրօրինակ դարբնոց է։
