Մարտի 8-ը՝ Կանանց միջազգային օրը, այս տարի ևս «Քվանտ» վարժարանում նշվեց գեղեցիկ և խորհրդանշական նախաձեռնությամբ, որի հեղինակը աշակերտական խորհուրդն էր։
Ցանկանալով իրենց երախտագիտությունն ու ջերմ վերաբերմունքը հայտնել վարժարանի կին աշխատակիցներին՝ աշակերտական խորհուրդը պատրաստել էր փոքրիկ, բայց շատ իմաստալից նվերներ։ Յուրաքանչյուր նվերին կից բանաստեղծություններ էին, որոնց ստեղծման վրա աշխատել էր աշակերտական խորհրդի մշակույթի հանձնաժողովը։ Այս նախաձեռնությունը ոչ միայն հաճելի անակնկալ էր աշխատակիցների համար, այլև երախտագիտության անկեղծ խոսք՝ նրանց ամենօրյա նվիրումի ու աշխատանքի համար։
Վարժարանի աշխատակիցների զգալի մասը այսօր կանայք են, որոնք մեծ պատասխանատվությամբ և սիրով կրթում ու դաստիարակում են նոր սերնդին։ Նրանց ջանքերի շնորհիվ վարժարանը միայն գիտելիքի փոխանցման վայր չէ, այլ նաև ջերմ միջավայր, որտեղ ձևավորվում են արժեքներ, վերաբերմունք և մարդկային որակներ։
Աշակերտական խորհրդի նախաձեռնությունը ևս մեկ անգամ ցույց տվեց, որ քվանտական պատանիները գնահատում են իրենց ուսուցիչների ու աշխատակիցների գործունեությունը, աշխատանքը։
Երբ երախտագիտությունն արտահայտվում է ստեղծագործ խոսքով ու հոգատար վերաբերմունքով, այն դառնում է առավել ազդեցիկ և հիշվող։
Հ.Լ.
