1 ՈՍԿԻ, 3 ԱՐԾԱԹ, 1 ԲՐՈՆԶ.
Ամփոփվեցին ս. թ. հունիսի 20-23-ը կիրառական կենսաբանության՝ Ինդոնեզիայի Բալի քաղաքում անցկացված միջազգային 4-րդ օլիմպիադայի (IABO)
արդյունքները:
Ուրախությամբ արձանագրենք, որ Հայաստանը ներկայացնող 8 մասնակիցն էլ արժանացել են մեդալների. նրանցից 5-ը քվանտական պատանիներ են:
Մասնակիցները նախօրոք առցանց ձևաչափով մասնակցել ու հաղթահարել են նախնական երկու փուլերը՝ հնարավորություն ստանալով մասնակցելու եզրափակիչ փուլին: Վերջինիս տարբեր երկրների (Հայաստան, ԱՄՆ, Բանգլադեշ, Ինդոնեզիա, Թաիլանդ, Մալազիա, Նեպալ, Ֆիլիպիններ) ավելի քան 100 պատանիների հետ մրցելով՝ քվանտականները համալրել են վարժարանի օլիմպիական մեդալաշարը:
Ոսկե մեդալ է նվաճել 11-րդ դասարանի աշակերտ Արամ Քերոբյանը: Արծաթե մեդալների են արժանացել 11-րդ դասարանի աշակերտներ Արա Մելքոնյանը և Հրաչյա Սևոյանը, 9-րդ դասարանի աշակերտ Անի Գևորգյանը: Բրոնզե մեդալ է ստացել 10-րդ դասարանի աշակերտ Հայկ Հարությունյանը։
Հայաստանի թիմը ղեկավարել է «Քվանտ» վարժարանի լավագույն շրջանավարտներից, ներկայումս վարժարանի կենսաբանության ամբիոնի խոստումնալից ուսուցիչ Վահագն Գևորգյանը։
Ջերմորեն շնորհավորում ենք բոլոր մեդալակիրներին՝ մաղթելով, որ նրանց հաղթական ընթացքը շարունակվի այս տարվա միջազգային բոլոր օլիմպիադաների մասնակից քվանտականների կողմից:
Հ.Լ.
