...
Գիտելիքի ուժով քվանտականը բացում է աշխարհի դռները և մուտք գործում իր երազանքի համալսարանը:
Սպասված լուրն ի վերջո ստացվել է․ հայտնի են ՄԲ «Դիպլոմա» ծրագրի 2024-25 ուստարվա շրջանավարտների ամփոփիչ գնահատականները, և ուրախությամբ պիտի արձանագրենք, որ այս ասպարեզում ևս քվանտականները ոչ միայն հետ չեն մնում աշխարհի կրթական զարգացումներից, այլև շատ դեպքերում գերազանցում են աշխարհում գրանցած արդյունքները:
Երկու տարվա նվիրումով ու հետևողականությամբ իրականացված ուսումնառություն, տքնաջան աշխատանք և անսահման ձգտում, որոնք տվել են փայլուն պտուղներ, պսակվել աննկարագրելի հաջողությամբ։ Պատահական չէ, որ այս անգամ ևս վարժարանի՝ ՄԲ «Դիպլոմա» ծրագրի սովորողները հիմնականում արդարացրել են ուսուցիչների և իրենց սպասելիքները. նրանց քննական գնահատականների միջինը այս տարի ևս 4,5-5 միավորով բարձր է աշխարհի այլ դպրոցների նույն ծրագրով սովորողների քննական միջին գնահատականներից: Ուրախությամբ նշենք, որ այս տարվա ՄԲ «Դիպլոմա» ծրագրի շրջանավարտների շուրջ 30 ％-ը ստացել է 40 և ավելի միավոր առավելագույն 45-ից: Անշուշտ, այս ոլորտին քաջածանոթ մարդիկ կհավաստեն, որ դա դժվարամատչելի բարձունք է և խոսում է ինչպես աշակերտների բացառիկ պատրաստվածության, այնպես էլ բարձրակարգ ուսուցիչների հոգատար ու սրտացավ աշխատանքի մասին։
2011 թվականից հանրակրթության ոլորտում աշխարհի ամենահզոր կազմակերպության՝ Միջազգային բակալավրիատի անդամ դարձած «Քվանտ» վարժարանը հայկական առաջին դպրոցն է, որ իրականացնում է «Դիպլոմա» ծրագիրը և անդամակցության հենց առաջին տարվանից ապացուցել է, որ աշխարհի կրթական զարգացումներին համընթաց գործունեություն է կազմակերպում՝ դրանով նպաստելով աշխարհում մրցունակ մասնագետ պատրաստելու չափազանց կարևոր գործին:
ՄԲ ծրագրի կրթական հարթակը պահանջում է ոչ միայն ակադեմիական խորքային պատրաստվածություն, այլև քննադատական մտածողություն, հետազոտական հմտություններ, սոցիալական պատասխանատվություն։ Այս տարվա արդյունքները ևս վկայում են, որ մեր սաները լիարժեք տիրապետում են անհրաժեշտ հմտություններին և պատրաստ են նորագույն մարտահրավերների։
Ջերմորեն շնորհավորում ենք ՄԲ «Դիպլոմա» ծրագրի այս տարվա՝ ավարտական փայլուն քննություններ հանձնած և արդեն աշխարհի մի շարք առաջատար համալսարաններ (Օքսֆորդ, UBC, UCL, ICL և այլն) ընդունված մեր շրջանավարտներին՝ խորապես համոզված լինելով, որ քվանտականի և հայ մարդու պատվի ու արժանապատվության շատ բարձր նշաձող պիտի սահմանեն նաև իրենց գործունեության մյուս փուլերում:
Հ. Լ.
