...
Ս․ թ․ հուլիսի 17-20-ը «Քվանտ» վարժարանի՝ Աղավնաձորում գտնվող «Ուղեծիր» ուսումնական կենտրոնի հյուրընկալ հարկի տակ հավաքվել էին վարժարանի տարբեր ամբիոնների շատ ուսուցիչներ։ Նպատակը տարեվերջյան ամփոփիչ աշխատաժողովն էր, որի շրջանակում կազմակերպվեցին տարբեր սեմինարներ, դասախոսություններ, հանդիպումներ կրթական-գիտական ոլորտի տարբեր ներկայացուցիչների հետ:
Այդ սեմինարների, հանդիպումների և քննարկումների ընթացքում ներկայացվեցին կենսական նշանակություն ունեցող մի շարք խնդիրներ, բազմաշերտ քննարկումներ ծավալվեցին դրանց վերաբերյալ, փորձ արվեց գտնել զգալի հարցերի համակարգային լուծումներ։
«Քվանտ» վարժարանի ուսուցիչների ատեստավորման հայեցակարգի մասին ընդգրկուն և ամբողջական ներկայացմամբ հանդես եկավ Ա. Ստեփանյանը:
Վարժարանի կառավարման տեղեկատվական համակարգի նոր հնարավորությունների մասին խոսեց Ս. Աղամիրյանը՝ ուսուցիչներին հորդորելով օգտվել այդ համակարգի ընձեռած ընտիր ու բազմաշերտ զինանոցից և դրանով նպաստել ուսուցման գործընթացի առավել արդյունավետ կազմակերպմանը:
Առարկայական ամբիոնների վարիչները հանդես եկան վերջին ուստարում իրենց ղեկավարած ամբիոնների աշխատանքների վերաբերյալ հաշվետվությամբ:
Վարժարանի հոգեբանական ծառայության ղեկավար Ելենա Բարտենևան հանդես եկավ սոցհարցմանը՝ որպես ուսուցիչ-աշակերտ հետադարձ կապի ամենաարդյունավետ ձևերից մեկը:
Ուշագրավ էր նաև վարժարանի տնօրեն Ռ. Վարդանյանի հետ հանդիպումը, որի ընթացքում բանախոսը ներկայացրեց վարժարանի նախորդ ուստարվա ձեռքբերումները, նախանշեց անելիքները, խոսեց մարտահրավերների մասին:
Աղավնաձորյան կառուցողական քննարկումների և արդյունավետ համագործակցության շնորհիվ ծնվեցին փայլուն գաղափարներ։
Քվանտականների քառօրյա այս հավաքը նշանավորվեց մարզական-մշակութային հետաքրքիր միջոցառումների անցկացմամբ, բնության այդ գողտրիկ անկյունում հիանալի բնապատկերները վայելելով, նաև գործընկերային հարաբերությունների ամրապնդմամբ:
Հ.Լ.
