ՀԱՅ ՊԱՏԱՆԻՆԵՐԻ ՄՇԱԿՈՒԹԱՅԻՆ ՀԱՂԹԱՆԱԿԸ ՄԻՋԱԶԳԱՅԻՆ ԱՍՊԱՐԵԶՈՒՄ. ՔՎԱՆՏԱԿԱՆՆԵՐԸ ՊԱՏՎՈՎ ՆԵՐԿԱՅԱՑՐԻՆ ՀԱՅԱՍՏԱՆԸ «Дети Содружества» ՄԻՋԱԶԳԱՅԻՆ ՖՈՐՈՒՄՈՒՄ
09.08.2025
«Քվանտ» վարժարանը շարունակաբար ընդգծում է միջազգային կրթական և մշակութային կառույցների հետ համագործակցության կարևորությունը՝ սերմանելով իր սաների մեջ ոչ միայն գիտելիք, այլև գլոբալ մտածողություն և ազգային ինքնագիտակցություն։ Այս տարի ևս վարժարանի սաները պատվով և ինքնատիպ ներկայացան «Дети Содружества» միջազգային երիտասարդական ֆորումում, որն անցկացվեց Բելառուսում՝ մեկտեղելով ԱՊՀ տարբեր երկրներից ժամանած հարյուրավոր պատանիների։
Հայկական պատվիրակությունը, որը կազմված էր «Քվանտ» վարժարանի ավագ դասարանի լավագույն սաներից, այս տարի ևս ղեկավարում էին վարժարանի աշխատակիցներ Սոս Աղամիրյանը և Արաքս Հովակիմյանը։ Երիտասարդ քվանտականները ոչ միայն գործուն մասնակցություն ունեցան ֆորումի շրջանակում կազմակերպված բազմաբովանդակ միջոցառումներին, այլև աչքի ընկան իրենց ինքնատիպ, գեղարվեստական և խոր բովանդակությամբ հանդեսով։
Քվանտականների ներկայացումը գերազանցեց ակնկալիքներն ու սահմանները։ Նրանք բեմ բարձրացան ոչ թե առանձին համարներով, այլ ամբողջական, սյուժետային լուծումով ձևավորված ազգային ներկայացմամբ, որը միախառնեց հայ ժողովրդի հոգեզմայլ երաժշտությունը, ազգային պարը, մշակութային գոհարներն ու պատմական հերոսականությունը։ Քանի որ այս տարի նշվում է ֆաշիզմի դեմ հաղթանակի 80-ամյակը, պատանիները հատուկ ընդգծեցին հայ ժողովրդի դերը պատմական այդ հաղթանակում՝ ներկայացման մեջ ներառելով նաև այդ ժամանակաշրջանի շունչը։
Ուշագրավ է այն, որ քվանտականները նաև մի յուրահատուկ կամուրջ դարձան մշակույթների միջև։ Նրանք այլազգի իրենց հասակակիցներին սովորեցրին պարել հայկական պոպուրի, երգել թամզարա, գրել հայերեն տառեր, հասկանալ մեր լեզվի մի շարք բառերի իմաստները և գործածել այդ բառերը։ Սա ոչ միայն ուսուցում էր, այլև մշակութային դեսպանության փայլուն դրսևորում։
Ֆորումի կազմակերպիչների և մասնակիցների տպավորիչ գնահատականները չուշացան․ հայկական պատվիրակությունը դարձավ բոլորի ուշադրության կենտրոնում։ Նրանք հաջողեցրին ոչ միայն իրենց հայրենիքը ներկայացնել պատվով, այլև ազգային արժեքները հաղորդել համամարդկային հարթակին։
Միջազգային այսպիսի նախաձեռնություններ միանշանակ անփոխարինելի են՝ որպես հարթակ արժևորելու ազգայինը, ընդգծելու ինքնությունն ու ստեղծելու համերաշխության կամուրջներ աշխարհի պատանիների միջև։
«Քվանտ» վարժարանի սաները՝ ինչպես միշտ, ոչ միայն իրենց կրթական գիտելիքներով, այլև իրենց հոգու և մշակույթի ուժով են Հայաստանը ներկայացնում՝ արժանապատվորեն, խոնարհ և ինքնատիպ։
