Նորություններ

Հայ պատանու օլիմպիական հաղթարշավը փայլուն շարունակում է հայ զինվորը․․․

09.11.2020

Հայը հաղթող է ամենուր։ Ահասարսուռ պատերազմի պատճառով վերջին երկու ամիսներին մեր երկրում տիրող ծանր տրամադրությունները ամենևին չխանգարեցին հայ պատանիներին պատշաճ կերպով պատրաստվել և մասնակցել աստղագիտության և աստղաֆիզիկայի միջազգային 14-րդ օլիմպիադային, որն առցանց անցկացվեց Էստոնիայում։
Օլիմպիադայի մասնակից 40 երկրների ավելի քան 280 աշակերտների մեջ իրենց փայլուն գիտելիքներով աչքի ընկան Հայաստանը ներկայացրած չորս պատանիներ, որոնք բոլորն էլ արժանացել են մեդալների՝ մեկը՝ ոսկե, երեքը՝ արծաթե։ Նրանցից մեկն էլ քվանտական Դավիթ Գյուլամիրյանն է․ վարժարանի 11-րդ դասարանի աշակերտը արժանացել է արծաթե մեդալի։
Ուրախությամբ արձանագրենք, որ հայ պատանիների փառահեղ այս հաղթանակը միջազգային հարթակում ավելի է արժևորվում, երբ տեսնում ենք, որ օլիմպիադայի մասնակցող 10-միլիոնանոց Ադրբեջանի և ավելի քան 70-միլիոնանոց Թուրքիայի թիմերի անդամներից որևէ մեկը նույնիսկ գովասանագրի չի արժանացել։
Կրթության ոլորտում հաղթում ենք։ Ուզում ենք հավատալ, որ հայ պատանու օլիմպիական հաղթարշավը փայլուն շարունակում է հայ զինվորը․․․
Ջերմորեն շնորհավորում ենք բոլոր նրանց, ում մեծագույն հրճվանքի ու ոգևորության պահեր է պարգևել միջազգային հեղինակավոր այդ օլիմպիադայում հայ պատանիների արձանագրած փայլուն հաղթանակը։
Փառք ու պատիվ հաղթող հայի տեսակին․․․