Այսօր «Քվանտ» վարժարանում առանձնահատուկ օր էր՝ լի ոչ միայն մարզական պայքարի ոգով, այլև խորին հարգանքի, հիշողության և ...
Գիրքը, ստեղծագործ միտքը և բարեգործությունը տարիներ շարունակ եղել են «Քվանտ» վարժարանի կրթական ու արժեհամակարգային միջավայրի անբաժան ուղեկիցները։ Իսկ երբ այս արժեքները համադրվում են մեկ նախաձեռնության շուրջ, ծնվում է մի գաղափար, որը ոչ միայն գեղեցկացնում է քվանտական առօրյան, այլև դառնում է մարդասիրության, համախմբվածության և հասարակական պատասխանատվության խոսուն օրինակ։ «Քվանտ» վարժարանի հիմնադիր դպրոցում արդեն տարիներ շարունակ ձևավորվել է գեղեցիկ և խորապես խորհրդանշական ավանդույթ։ Գրքի տոնին նվիրված միջոցառումների շրջանակում սովորողները սեփական ձեռքերով պատրաստում են ինքնատիպ գրքեր, որոնք ներկայացվում են «Գիրքն անգին է» ցուցահանդես-վաճառքին։ Նախաձեռնությունը սկիզբ է առել 2019 թվականին և ժամանակի ընթացքում դարձել է վարժարանի սպասված, ամենաջերմ ու ամենաբարի միջոցառումներից մեկը։ Այս նախաձեռնության հիմքում միայն գրքի հանդեպ սերը չէ։ Այն իր մեջ միավորում է ընթերցասիրությունը, ստեղծագործական աշխատանքը, ընտանեկան ներգրավվածությունը, մանկական երևակայությունն ու մեկ ուրիշին օգտակար լինելու ազնիվ պատրաստակամությունը։ Պատրաստված յուրաքանչյուր գիրք փոքրիկ քվանտականի մտքի, ջանքի, խնամքի և սրտի արտահայտությունն է։ Ս.թ. փետրվարի 19-ին «Քվանտ» վարժարանի դահլիճում կրկին տիրում էր տոնական, ջերմ և ոգեշնչող մթնոլորտ։ Օրը առավել խորհրդանշական էր, քանի որ փետրվարի 19-ը նաև Ամենայն հայոց բանաստեղծ Հովհաննես Թումանյանի ծննդյան օրն է։ Միջոցառման ընթացքում ներկաներին ուղեկցում էին Թումանյանի լուսավոր աշխարհը, նրա ստեղծագործությունների սիրելի հերոսները, իմաստուն խոսքն ու բարության անսպառ շունչը։ Այս տարի փոքրիկ քվանտականները պատրաստել էին շուրջ 500 գիրք։ Ցուցահանդես-վաճառքի ներկայացված գրքերը սպառվեցին անհավատալի արագությամբ՝ ընդամենը մի քանի ժամում։ Այս փաստը լավագույնս վկայում է այն մեծ վստահության, ջերմության և միասնականության մասին, որով քվանտական համայնքը տարիներ շարունակ աջակցում է բարի նպատակ ունեցող նախաձեռնություններին։ Միջոցառման իրական արժեքը, սակայն, առավել խորն է։ Գրքերի վաճառքից գոյացած ողջ հասույթը, ինչպես ամեն տարի, ուղղվում է բարեգործության՝ ևս մեկ անգամ վերահաստատելով բարեգործ քվանտականի բարի համբավը։ Այս տարի «Գիրքն անգին է» ցուցահանդես-վաճառքի արդյունքում հավաքվել է 1,375,000 ՀՀ դրամ: Որոշվել է ողջ գումարը փոխանցել 2-ամյա Ռոբերտի բուժման նպատակով։ Փոքրիկ Ռոբերտն այժմ քաղցկեղի դեմ ծանր պայքար է մղում, և այս աջակցությունը կարևոր ներդրում է արտերկրում նրա բուժման կազմակերպման գործում։ Հատկապես հուզիչ է գիտակցել, որ երեխաների ձեռքերով ստեղծված գրքերը, նրանց երևակայությունը, աշխատանքն ու սերը վերածվում են իրական օգնության՝ ուղղված մեկ այլ երեխայի կյանքի և առողջության համար պայքարին։ Սա այն դեպքերից է, երբ կրթությունը դուրս է գալիս դասասենյակի սահմաններից և դառնում կյանքի դաս։ Երեխաները սովորում են, որ գիրքը կարող է լինել ոչ միայն գիտելիքի, մշակույթի և երևակայության աղբյուր, այլև բարության կամուրջ։ Նրանք տեսնում են, որ իրենց ձեռքերով ստեղծված փոքրիկ աշխատանքը կարող է մեծ նշանակություն ունենալ մեկ այլ ընտանիքի համար, կարող է հույս պարգևել, ուժ տալ և դառնալ կյանքի համար մղվող պայքարի մի մասնիկ։ «Գիրքն անգին է» նախաձեռնությունը ևս մեկ անգամ փաստում է, որ «Քվանտ» վարժարանում կրթությունը դիտարկվում է ոչ միայն որպես գիտելիք փոխանցելու գործընթաց, այլև որպես արժեքներ ձևավորելու ճանապարհ։ Այստեղ երեխաները սովորում են ստեղծել, մտածել, կարդալ, զգալ, օգնել և պատասխանատվություն կրել։ Հենց այդ ամենի համադրությունն է ձևավորում ոչ միայն լավ աշակերտ, այլև հոգատար, գիտակից և մարդասեր անհատ։ Շնորհակալություն «Քվանտ» վարժարանի հիմնադիր դպրոցի սաներին, նրանց ծնողներին, ուսուցիչներին և ողջ համայնքին՝ այս ջերմ, ազնիվ ու կարևոր նախաձեռնության համար։ Ռոբերտի կողքին կանգնելու այս քայլը ևս մեկ անգամ վկայում է, որ համախմբված բարությունը կարող է իրական հույս դառնալ։ Երբ միտքն ու հոգին ներդաշնակորեն համադրվում են, ծնվում է ոչ միայն ընտիր գաղափար, այլև բարի գործ, որը կարող է լուսավորել մեկ երեխայի կյանքի ճանապարհը։ Հ. Լ.
