Այսօր «Քվանտ» վարժարանում առանձնահատուկ օր էր՝ լի ոչ միայն մարզական պայքարի ոգով, այլև խորին հարգանքի, հիշողության և ...
ՕԼԻՄՊԻԱԿԱՆ ՀԱՋՈՂՈՒԹՅՈՒՆՆԵՐԻ ՀԻՄՔՈՒՄ ՈՒՍՈՒՑՉԻ ՆՎԻՐՈՒՄՆ Է...
«Քվանտ» վարժարանի տնօրենության նախաձեռնությամբ կազմակերպվել էր գեղեցիկ և խորհրդանշական միջոցառում՝ նվիրված օլիմպիական խմբակներում պարապող ուսուցիչների աշխատանքի արժևորմանը։ Միջոցառման շրջանակում շնորհակալագրեր հանձնվեցին վարժարանի՝ տարբեր տարիքային խմբերի օլիմպիական խմբերում սաների հետ աշխատող ուսուցիչներին՝ ի գնահատումն նրանց նվիրվածության, մասնագիտական բարձր պատասխանատվության և աշակերտների մտավոր ներուժի բացահայտման ու զարգացման գործում ունեցած նշանակալի ներդրման։
Օլիմպիական հաջողությունները երբեք պատահական չեն լինում։ Դրանց հիմքում տարիների հետևողական աշխատանքն է, ուսուցչի համբերությունը, աշակերտի կարողություններին հավատալու ուժը և բարդ ճանապարհին նրան ճիշտ ուղղորդելու պատրաստակամությունը։ Հենց այդ աշխատանքն էր միջոցառման գլխավոր առանցքում․ աշխատանք, որը հաճախ մնում է տեսադաշտից դուրս, սակայն դառնում է յուրաքանչյուր հաղթանակի անտեսանելի, բայց ամուր հիմքը։
Միջոցառման նախաձեռնող Ս. Գալստյանը ներկայացրեց վերջին եռամյակում տարբեր առարկաների օլիմպիադաներում քվանտական պատանիների արձանագրած հաջողությունների պատկերը՝ ըստ առարկաների։ Ներկայացված արդյունքները ևս մեկ անգամ փաստեցին, որ վարժարանում ձևավորված օլիմպիական միջավայրը շարունակում է լինել արդյունավետ, ոգեշնչող և զարգացմանը միտված։ Քվանտականների ձեռքբերումները ոչ միայն մրցանակներ և դիպլոմներ են, այլև մտածելու, որոնելու, հաղթահարելու և գիտելիքով առաջ գնալու մշակույթի վկայություն։
Միջոցառման ամենահուզիչ պահերից էին տարբեր տարիների օլիմպիական քվանտականների տեսաուղերձները։ Աշխարհի առաջատար համալսարաններում սովորող կամ արդեն շրջանավարտ մեր սաները իրենց խոսքում խորին երախտագիտություն հայտնեցին սիրելի ուսուցիչներին՝ ընդգծելով, որ իրենց օլիմպիական հաղթանակների, մասնագիտական կողմնորոշման և հետագա հաջողությունների ճանապարհին ուսուցիչների ներդրումը եղել է անգնահատելի։ Նրանց ուղերձներում հնչող յուրաքանչյուր շնորհակալություն վկայում էր մի կարևոր իրողության մասին․ ուսուցչի աշխատանքը չի ավարտվում դասաժամով կամ օլիմպիադայի արդյունքով։ Այն շարունակվում է աշակերտի մտածողության, ընտրած մասնագիտության, կյանքի նպատակների և ապագա հաջողությունների մեջ։
Վարժարանի տնօրենության կողմից շնորհակալագրերի հանձնումը ոչ միայն գնահատանքի գեղեցիկ ժեստ էր, այլև կրթական կարևոր ուղերձ․ օլիմպիական շարժման ուժը մարդկանց մեջ է՝ նվիրված ուսուցիչների, աշխատասեր աշակերտների և նրանց կողքին կանգնած կրթական միջավայրի։
Շնորհակալություն մեր բոլոր ուսուցիչներին՝ գիտելիքի հանդեպ սեր ձևավորելու, սաներին դժվարություններից չվախենալ սովորեցնելու, նրանց ներուժին հավատալու և օլիմպիական սերունդ կերտելու կարևոր գործում ունեցած արժեքավոր ավանդի համար։
Քվանտականների նոր հաջողությունների հիմքում կրկին նույն անփոխարինելի ուժն է՝ ուսուցիչը, նրա հավատը, նվիրումը և բարձր գիտակցությունը:
Հ. Լ.
