...
Սիրելի՛ աշակերտներ, ծնողներ և ուսուցիչներ, ավարտվում է 2024 թվականը։ Տարին քվանտականների համար նշանավորվում է բազում հաջողություններով, լրջագույն նվաճումներով։
2024թ․ ողջ ընթացքում «Քվանտ» վարժարանի սաները միջազգային հեղինակավոր օլիմպիադաներում արժանացել են բազմաթիվ մեդալների՝ իրենց օլիմպիական զինանոցը հարստացնելով ոսկե, արծաթե ու բրոնզե մեդալներով։ Ուզում ենք հավատալ, որ օլիմպիական հաղթարշավում փայլուն մասնակցությունը քվանտականները կշարունակեն նաև գալիք տարում։
Հավատարիմ իր առաքելությանը՝ «Քվանտ» վարժարանը այս տարի էլ շարունակեց բարեգործական գործունեությունը՝ հաստատելով, որ բարի գործեր անելը դարձել է քվանտականի կենսակերպը։
Տարին չափազանց արդյունավետ էր միջագզային կրթական-գիտական հեղինակավոր կառույցների ներկայացուցիչների հետ համագործակցության առումով։ Ուշագրավ է ԱՄՆ Հարավային Կալիֆոռնիայի համալսարանի պրոֆեսոր, ոլորտի ամենափորձառու և արհեստավարժ մասնագետ, ինչպես նաև «Քվանտ» վարժարանի լավագույն բարեկամ Արամ Գալստյանի զրույց-դասախոսությունը արհեստական բանականության և դրա բերած առավելությունների ու թերությունների մասին: Նմանատիպ հանդիպումները մեծապես նպաստում են սովորողների՝ դարի պահանջներին համապատասխան մասնագիտություններին ավելի մոտ լինելուն, դրանց կարևորությունը գիտակցելուն և աշխարհի գիտակրթական զարգացումներին համընթաց քայլել կարողանալուն:
Կարևոր է քվանտականների մասնակցությունը Գիտության փառատոնին, որի շրջանակում «Քվանտ» վարժարանը գիտությունը սիրող ու գնահատող հանրությանը ներկայացավ իր ընդգրկուն ու տպավորիչ տաղավարով՝ «Գիտական ֆանտաստիկա. երևակայի՛ր» խորագրով ներկայացնելով վարժարանի սովորողների հետազոտական արդյունավետ գործունեության արգասիքները՝ քվանտականների ստեղծած սարքերը՝ անօդաչու թռչող սարք, առարկային հետևող ռոբոտ, բիոնիկ ձեռք, կամայական օբյեկտի հետևող ինքնավար համակարգ 1, նշանառության համակարգով ռոբոտ, ուլտրաձայնային ռադար, վճարային համակարգ, քվադրակոպտեր, արհեստական քիթ։
Արդեն մի քանի տարի է՝ մի խումբ քվանտականներ ԱՊՀ երկրների մի քանի հարյուրի հասնող պատանիների հետ մասնակցում են «Дети Содружества» անունը կրող միջազգային երիտասարդական ֆորումին՝ հնարավորություն ունենալով հաղորդակից լինելու միմյանց մշակույթներին, ազգային առանձնահատկություններին, ավանդույթներին։
Հայաստանի պատվիրակությունը, հանձինս քվանտականների, հանդես եկավ ոչ թե առանձին համարներով, այլ մի ինքնատիպ ներկայացմամբ, որը ազգային երգ ու պարի, հայ ժողովրդի պատմության գեղեցիկ համաձույլ էր։ Այն արժանացավ բոլորի, այդ թվում՝ ֆորումի ղեկավարների բարձր գնահատանքին։ Քվանտական պատանիները պատվով ներկայացրին թե՛ մեր երկիրը, թե՛ հարազատ կրթօջախը։
Հավատում ենք, որ գալիք տարում կշտկվեն նաև արձանագրված որոշ թերություններ։ Դեռ կան հրատապ լուծման կարոտ խնդիրներ և նոր մարտահրավերներ, որոնք պահանջում են բոլորիս համատեղ ջանքն ու աշխատանքը: Մեզանից յուրաքանչյուրի պատասխանատվությունն ու դավանած արժեքները պիտի իրական դարձնեն բոլոր համարձակ նախաձեռնությունների կյանքի կոչելը:
Սիրելի՛ քվանտականներ, ջերմորեն շնորհավորում ենք գալիք Ամանորն ու Սուրբ Ծնունդը՝ մաղթելով քաջառողջություն, առաջընթաց, միայն դրական լիցքեր, հույս, հավատ, սեր՝ բոլոր դժվարությունները հաջողությամբ հաղթահարելու և անվտանգ ու ապահով պետություն ունենալու, խաղաղ և բարօր կյանքով ապրելու համար: Թող 2025 թվականը լինի խաղաղության, հաղթանակների ու վերելքների տարի, լավատեսությամբ լցնի բոլորիս հոգիները, իրական երջանկությունը և հաջողությունը հասանելի ու տեսանելի լինեն բոլորիս: Բոլորիս ընտանիքներում և մեր հայրենիքում թևածեն լավատեսությունը, ներդաշնակությունն ու բարօրությունը: Սերը, հոգատարությունն ու փոխըմբռնման մթնոլորտը թող տիրեն յուրաքանչյուրիդ տանն ու ընտանիքում:
ՇՆՈՐՀԱՎՈՐ ԱՄԱՆՈՐ ԵՎ ՍՈՒՐԲ ԾՆՈՒՆԴ․․․
«Քվանտ» վարժարանի տնօրենություն
