Նորություններ
Քվանտականը բոլոր առումներով հայ զինվորի կողքին է․․․
03.11.2020
Հաղթանակները կերտվում են այն դեպքում միայն, երբ հանուն հայրենիքի կենաց ու մահու կռիվ տվող զինվորի թիկունքում անսասան կանգնած են հաղթող հայի բացառիկ տեսակներ։ Քվանտականը համոզված է, որ մեր ժողովրդի պատմության այս ծանրագույն ժամանակահատվածում ավելի, քան երբևէ անհրաժեշտ է ամուր պահել զինվորի թիկունքը, ամեն կերպ նպաստել նրա հաղթանակի հնարավոր դառնալուն։
Պատերազմը սկսելու հենց առաջին օրերից «Քվանտ» վարժարանի՝ ուսուցիչներից, աշակերտներից ու ծնողներից կազմված թիմը մեծագույն պատրաստակամությամբ ու խանդավառությամբ գործում է զինվորական քողարկող ցանցեր։ Արդեն գործվել և մեր պաշտպանության բանակին են ուղարկվել շուրջ մեկ տասնյակի հասնող պաշտպանիչ քողարկող ցանցեր։
Քվանտական կամավորների խումբը փորձում է նաև այսպես աջակցել առաջնագծում քաջաբար կռվող մեր զինվորներին և հոգու խորքում թաքուն հույս է փայփայում, որ պատերազմը շուտով կավարտվի, և իրենց գործած ցանցը հայ զինվորը կօգտագործի ոչ թե կռվի, այլ հայոց բանակում խաղաղ ծառայության ժամանակ։
Շնորհակալություն վարժարանի ծնողական համայնքին, որ եռանդուն կերպով մասնակցում է ոչ միայն ցանցեր գործելու, այլ նաև անհրաժեշտ հումքը ձեռք բերելու աշխատանքներին։
