Նորություններ
Աշխարհահռչակ գիտնականը «Քվանտ» վարժարանում է...
10.06.2022
«Քվանտ» վարժարանը մեծապես կարևորում է համագործակցությունը ոչ միայն գիտական-կրթական ոլորտում հեղինակավոր միջազգային կազմակերպությունների, այլ նաև անվանի գիտնականների հետ: Նմանատիպ համագործակցության շրջանակում «Քվանտ» վարժարան այցելեց Ռուսաստանի գիտությունների ակադեմիայի պրոֆեսոր, Մոսկվայի ազգային հետազոտական տեխնոլոգիական համալսարանի պրոֆեսոր, Եվրոպայի ակադեմիայի իսկական անդամ, քիմիայի թագավորական ընկերության իսկական անդամ, Ամերիկյան ֆիզիկական ընկերությունների իսկական անդամ Արտեմ Օհանովը: 2008-2017 թթ-ին նա եղել է Նյու Յորքի Սթոուն Բրուքի համալսարանի Նյութերի համակարգչային դիզայնի լաբորատորիայի ղեկավար։
Մեծանուն գիտնականը «Քվանտ» էր եկել վարժարանի՝ 2008թ. շրջանավարտ Հայկ Զաքարյանի հրավերով և հանդես եկավ չափազանց հետաքրքիր ու ընդգրկուն դասախոսությամբ՝ շուրջ 2 ժամ մեծապես կլանելով լսարանին:
ՌԴ Սկոլկովոյի գիտության և տեխնիկայի ինստիտուտի՝ հայկական արմատներով պրոֆեսորը դասախոսության ընթացքում ներկայացրեց իր կողմից մշակված «USPEX» մեթոդը, որը թույլ է տալիս կանխատեսելու նոր նյութեր, դրանց կառուցվածքը և հատկությունները: Նրա կողմից մշակված բյուրեղային կառուցվածքի կանխատեսման եզակի մեթոդը ներկայումս կիրառում են աշխարհի բազմաթիվ հետազոտողներ:
Հանդիպման մասնակիցները մեծապես հետաքրքրված էին մեծանուն գիտնականի կերպարով ու գործունեությամբ և հյուրին ուղղեցին բազում հարցեր: Արտեմ Օհանովը հայտնի է նոր նյութերի համակարգչային դիզայնի եւ բյուրեղային կառուցվածքների կանխատեսման մեթոդների ստեղծման, ինչպես նաեւ բարձր ճնշումների քիմիայի եւ մոլորակի ընդերքի նյութի ուսումնասիրություններով, ինչի վերաբերյալ ևս հնչեցին հարցեր:
Մեր հայրենակից անվանի գիտնականի հետ հանդիպմանը մասնակցում էին «Քվանտ» վարժարանի տարբեր դասարանների սովորողներ, պրոֆեսորադասախոսական կազմի ներկայացուցիչներ, հյուրեր:
Հանդիպման ավարտին արձանագրվեց, որ չափազանց արդյունավետ այս դասախոսությամբ դրվեց «Քվանտ» վարժարանի և անվանի գիտնականի բարեկամության հիմքը:
