Նորություններ
ՅՈՒՐՕՐԻՆԱԿ ԴԱՏԱՎԱՐՈՒԹՅՈՒՆ՝ ՔՎԱՆՏԱԿԱՆԻ ՄԱՍՆԱԿՑՈՒԹՅԱՄԲ
07.12.2023
《Քվանտ》վարժարանում դատավարություն է. մեղադրվում է իներցիան։
Առաջին հայացքից տարօրինակ, բայց և ինքնատիպ հայտարարություն, որ վարժարանի դահլիճ էր բերել շատերին։
Օրերս 《Քվանտ》վարժարանի դահլիճը լեփ֊լեցուն էր։ Ֆիզիկայի ամբիոնի երիտասարդ, բայց խոստումնալից ուսուցչուհի Ս. Գալստյանի նախաձեռնությամբ կազմակերպվել էր բաց դաս՝ 《Իներցիայի դատավարություն》 թեմայով։ Բաց դասի հիմնական նպատակն էր պատկերավոր ներկայացնել ֆիզիկական երևույթի ողջ էությունը, դրա դրական ու բացասական կողմերը և այդ գիտելիքի կիրառելիությունը կյանքի տարբեր բնագավառներում։
7֊5 դասարանի սովորողների մասնակցությամբ անցկացված դասը հետաքրքիր ձևաչափով էր կազմակերպված. բոլորը հավաքվել էին իրականացնելու իներցիայի դատավարությունը։ Մասնակիցները հեռագիր էին ուղարկել հին աշխարհի հայտնի մարդկանց՝ Արիստոտելին, Գալիլեո Գալիլեյին, Իսահակ Նյուտոնին, որոնք ողջունում կամ դատապարտում էին այդ ամենը։ Ապա ներս են հրավիրվում վկաներ, որոնք, կյանքից տարբեր օրինակներ բերելով, մեղադրում կամ պաշտպանում էին մեղադրյալին՝ իներցիային։ Նման ձևաչափը թույլ է տալիս չափազանց տպավորիչ կերպով ի ցույց դնելու կենցաղում մի շարք գործողությունների սերտ առնչությունը իներցիա երևույթին։
Դատավորը կայացնում է բացառիկ վճիռ՝ այնպես անել, որ իներցիայի միջոցով բնության հիմնարար օրենքները բացահայտվեն, երևույթի դրական կողմերն ընդլայնել, իսկ բացասական կողմերի դեմ արդյունավետ պայքար մղել՝ դրանք հնարավորինս կրճատելու ակնկալիքով։
Ֆիզիկայի ուսուցչուհի Ս. Գալստյանի դիտարկմամբ՝ անհրաժեշտ է պարբերաբար կազմակերպել տարբեր առարկաների բաց դասեր, քանի որ նմանատիպ միջոցառումները մեծապես նպաստում են սովորողների՝ դպրոցում ստացած գիտելիքը գործնականում կիրառելուն։
Ուշագրավ է նաև այն, որ բաց դասի ողջ ընթացքում պատանի քվանտականները փայլեցին ոչ միայն 《Ֆիզիկա》առարկայից ունեցած բազմաշերտ գիտելիքներով, այլև իրենց դերասանական տաղանդով, հիանալի ընդունակություններով։
Դահլիճի բուռն ծափահարությունները, թե՛ ուսուցիչների, թե՛ ծնողների և թե՛ տարբեր տարիքային խմբերի սովորողների խանդավառ ու ջերմ տրամադրությունները վառ վկայությունն են այն բանի, որ այս հիանալի նախաձեռնությունը պիտի շարունակական լինի։
Ջերմորեն ողջունում ենք թե՛ բարձրակարգ ուսուցչին և թե՛ ֆիզիկայի փայլուն իմացությամբ ու դերասանական լուրջ հմտություններով աչքի ընկած պատանի քվանտականներին՝ նրանց մաղթելով նմանատիպ ձևաչափով բազում բաց դասեր։
Հ. Լ.
