Նորություններ
ԳԻՏԵԼԻՔԻ ՕՐՎԱՆ ՆՎԻՐՎԱԾ ՄԻՋՈՑԱՌՈՒՄՆԵՐԻ ՄԵԿՆԱՐԿԸ «ՔՎԱՆՏ» ՎԱՐԺԱՐԱՆՈՒՄ ՏՐՎԱԾ Է ․․․
02.09.2025
Գիտելիքի օրվան նվիրված աշխույժ ու տոնական տրամադրությունները գերիշխող են նաև «Քվանտ» վարժարանում։ Հիմնադիր դպրոցն այսօր ընդունեց և ջերմորեն ողջունեց իր նոր սաներին։ Հուզմունքի ու ոգևորության, հրճվանքի ու բերկրանքի զգացողությունները միախառնվել են իրար։ Վարժարանի առաջին դասարանի փոքրիկներին ողջունելու են եկել ոչ միայն տնօրենության ներկայացուցիչները, ուսուցիչներ, այլ նաև ծնողներ, հարազատներ։ Հնչեց ՀՀ օրհներգը, որից հետո ներկայացվեց վարժարանի տնօրենության ուղերձը։ Շնորհավորական խոսքով ու մաղթանքներով հանդես եկան վարժարանի լավագույն ուսուցիչներից Ս. Սուվարյանը, ապա Այբբենարանի հեղինակ, փոքրիկների լավագույն բարեկամ Վաչագան Սարգսյանը։ Վերջինս իր հեղինակած գրքերից նվիրեց իր կողմից առաջարկված մրցույթի հաղթողներին: Իրենց գեղեցիկ համարներով ներկաներին հաճելի պահեր պարգևեցին հիմնադիր դպրոցի 2-4-րդ դասարանների սովորողները: Ապա հնչեց վարժարանի օրհներգը, որի հնչյունների ուղեկցությամբ դասվարները երեխաներին ուղեկցեցին իրենց դասարաններ, որտեղ նրանք հաղորդակից են լինելու գիտության ու կրթության լույսին։ Բարի երթ մաղթենք մեր փոքրիկներին՝ նրանց մաղթելով բազում բացահայտումներ գիտության ու կրթության անեզր աշխարհում․․․
