Նորություններ
Ազգային գեղեցիկ երգ ու խրոխտ պարի հնչյուններն են թևածում «Քվանտ» վարժարանում
09.06.2021
Ազգի լինելության, ազգային դիմագծի պահպանման հարցում մեծապես կարևորվում է ազգային արժեհամակարգը, իսկ վերջինիս կարևորագույն բաղադրիչներն են ազգային երգն ու պարը։ Հենց դրանք են արտահայտում յուրաքանչյուր ազգի բնորոշ գծերը, մանավանդ բարքն ու քաղաքակրթության աստիճանը:
«Քվանտ» վարժարանում անհատի ձևավորման, կայացման հարցում մշտապես կարևորում են սովորողներին ազգային ավանդույթների մասին գիտելիքներով զինելը, դրանց արժանի կրողը դարձնելը։ Հենց այդ նպատակով էր կազմակերպված այս գեղեցիկ միջոցառումը։ Վարժարանի՝ տարբեր տարիքային խմբերի մի շարք աշակերտներ նախապես սովորել էին Համբարձման տոնին նվիրված երգեր ու պարեր։ Հրավիրված էին տեր Եսայի քահանան, ով իր իմաստուն խոսքով արժևորեց ազգայինի դերը հայ մարդու կյանքում, նաև ազգային երգ ու պարը արժանիորեն ներկայացնող, քարոզող խումբ։
Վարժարանի բակում իսկական տոնախմբություն էր։ Համբարձման տոնին նվիրված բոլոր ծեսերը փայլուն կերպով իրականացվեցին։ Մեծ խանդավառություն առաջացրեց հատկապես վիճակ հանելու գեղեցիկ ավանդույթը։ Ժողովրդական երգ ու պարին գործուն մասնակցություն ունեցան նաև ուսուցիչները։
Քվանտականները իրենց խորին երախտագիտությունն են հայտնում վարժարանի երգի ուսուցչուհի Արաքս Հովակիմյանին։ Հենց նա էր նախաձեռնել այս հիանալի միջոցառումը։ Ուզում ենք հավատալ, որ նմանատիպ միջոցառումներ հաճախ կկազմակերպվեն վարժարանում՝ կերտելով իսկական հայի ազնիվ ու ճիշտ կերպարը։
