Նորություններ
ԹԱՏԵՐԱՍԵՐ ՔՎԱՆՏԱԿԱՆՆԵՐԸ ԴԱՍԱԿԱՆ ԱՐՎԵՍՏԻ ՀԵՏՔԵՐՈՎ․․․
21.10.2022
«Քվանտ» վարժարանի ուսուցիչները, դասղեկները քաջ գիտակցում են, որ անհատի ձևավորման գործում շատ կարևոր դեր ունի արվեստը։ Սովորողներին դասական արվեստի լավագույն նմուշներին հաղորդակից դարձնելը վարժարանի ուսումնադաստիարակչական գործընթացում մեծ տեղ ունեն։
Օրերս վարժարանի 8-4 դասարանի սովորողները դասղեկ Փ․ Դավթյանի ուղեկցությամբ Գաբրիել Սունդուկյանի անվան ազգային ակադեմիական թատրոնում էին, որտեղ ներկայացվում էր հայ դասական գրականության լավագույն նմուշներից մեկը՝ «Պեպո» պիեսը:
Հայ բեմը շատ է պեպոներ ունեցել։ Այս անգամ Պեպոյի կերպարը մարմնավորում էր Տիգրան Ներսիսյանը: Զիմզիմովի դերակատար Արմեն Մարությանն էր։
Ծանոթ լինելով պիեսի բնագրային տարբերակին՝ քվանտականները մեծ հետաքրքրությամբ էին դիտում ներկայացումը՝ փորձելով գտնել սյուժետային տարբերությունները։ Ինչպես նշեց դասղեկ Փ․ Դավթյանը, 19-րդ դարի դրամատուրգի պիեսում ներկայացված գաղափարական հարցադրումները և կերպարները այսօր էլ արդիական են․ Պեպոյի, Զիմզիմովի ու մեր ժամանակների առնչություններն ակնհայտ են։
Ստեղծագործական խմբին հաջողվել է նոր լուծումներով հանդիսատեսին ներկայացնել դասական, բայց նաև այսօրվա շնչով հագեցած ներկայացում:
