Նորություններ
«Քվանտ» վարժարանի շրջանավարտը խորհուրդ է տալիս կրտսեր քվանտականներին...
27.11.2024
«Քվանտ» վարժարանի տարբեր տարիների մի շարք տաղանդավոր շրջանավարտներ, մասնագիտական կայացման հետաքրքիր ուղի անցնելով, հասնում են լրջագույն հաղթանակների: Ուրախալին այն է, որ նրանք իրենց հաղթանակների կերտման ճանապարհին մեծապես կարևորում են հարազատ կրթօջախի դերն ու նշանակությունը:
Ս. թ. նոյեմբերի 21-ին՝ ժամը 13:30-ին, վարժարանի 301 բ դահլիճում տեղի ունեցավ դաս-հանդիպում SuperAnnotate ընկերության գործադիր տնօրեն, վարժարանի լավագույն շրջանավարտներից Տիգրան Պետրոսյանի հետ:
Հանդիպմանը մասնակցում էին վարժարանում սովորող բազմաթիվ պատանիներ, որոնք հետաքրքրված են արհեստական բանականությամբ և դրա հետ կապված զարգացումներով:
Հանդիպման ընթացքում Տիգրանը պատմեց իր գործունեության, անցած ճանապարհի, դժվարությունների ու հաղթանակների մասին: Հանգամանորեն պատասխանեց նաև պատանի քվանտականներին հետաքրքրող բոլոր հարցերին: Նա կրտսեր քվանտականներին հորդորեց շատ լավ սովորել բոլոր առարկաները, ամբարել գիտելիքների մեծ պաշար և չվախենալ դժվարություններից, քանի որ այդ դեպքում բոլոր խոչընդոտները միանգամից հօդս կցնդեն
Ուզում ենք հավատալ, որ նմանատիպ հանդիպումները մեծապես ոգևորում են կրտսեր քվանտականներին՝ նրանց ևս մղելով հաղթական ուղի անցնելու:
Հ. Գ. Հանդիպումից հետո Տիգրան Պետրոսյանը բացառիկ հարցազրույց տվեց նաև «Քվանտ» մեդիա կենտրոնի նախագծերից մեկի ներկայացուցչին:
Հաղորդումը շուտով կլինի վարժարանի յութուբյան ալիքում:
